Кристиан Эриксен яна майдонда ҳушини йўқотди
Дания терма жамоаси яримҳимоячиси Кристиан Эриксен Украина билан ўртоқлик учрашувида ҳушини йўқотди. Ўйин Даниянинг Оденсе шаҳридаги «EWII Park – Odense» стадионида бўлиб ўтаётган эди. Учрашув Дания фойдасига 2:1 ҳисоби қайд этилаётган вақтда тўхтатилди.
Кўнгилсиз воқеа иккинчи бўлим ўрталарда юз берди. Футболчининг майдонга йиқилиш лаҳзаси трансляцияда кўрсатилмади. Ўйин 75-дақиқада тўхтатилди ва қайта давом эттирилмади.
Учрашувдаги биринчи голни 13-дақиқада Дания терма жамоаси ярим ҳимоячиси Патрик Доргу киритди. 36-дақиқада эса ҳимоячи Йоаким Мехле мезбонларнинг устунлигини иккитага оширди. 44-дақиқада Украина терма жамоаси ярим ҳимоячиси Виктор Циганков жавоб голини уришга муваффақ бўлди.
Ҳар икки миллий терма жамоа ҳам 2026 йилги Жаҳон чемпионатига йўлланма ололмаган.
ЖЧ-2026 Европа саралаш босқичининг «C» гуруҳида Дания иккинчи ўринни эгаллади, бироқ плей-офф раундида Чехия терма жамоасига имкониятни бой берди (2:2, пенальтилар сериясида 1:3).
Украина ҳам «D» гуруҳида иккинчи ўринни эгаллади, аммо плей-оффнинг 1/2 финал босқичида Швецияга мағлуб бўлди (1:3).
