Криштиану Роналдунинг сармояси «Альмерия»ни Испаниянинг энг машҳур клублари қаторига олиб чиқди
Португалия терма жамоаси ва «Ан Наср» ҳужумчиси Криштиану Роналдунинг «Альмерия» клубига киритган сармояси жамоанинг медиа-майдондаги нуфузини сезиларли даражада оширди. Испания иккинчи дивизиони вакили ҳисобланган мазкур клуб акцияларининг 25 фоизини сотиб олганидан сўнг, унинг ижтимоий тармоқлардаги аудиторияси кескин кўпайди.
Роналдунинг сармояси ортидан юзага келган «медиа-бум» клубнинг халқаро миқёсдаги танилишига замин яратди. Натижада, «Альмерия» Ла Лиганинг аксарият жамоаларини ортда қолдириб, ижтимоий тармоқлардаги кузатувчилар сони бўйича Испаниянинг энг нуфузли бешта клуби сафига кирди.
Бугунги кунда Испания клублари орасида оммабоплик бўйича «Реал Мадрид» 181 миллион обуначи билан етакчилик қилмоқда. Иккинчи ўринни 147 миллион кузатувчи билан «Барселона» эгаллаган бўлса, «Атлетико Мадрид» 18 миллион обуначи билан кучли учликни якунлайди. «Севилья» клуби 3,6 миллион обуначи билан тўртинчи ўринда қайд этилган. «Альмерия» эса айни дамда 3,2 миллион обуначи билан мазкур рўйхатда бешинчи поғонани эгаллаб турибди.
Муттахассислар Роналдунинг глобал бренд сифатида клубга жалб этилиши «Альмерия»нинг келгусида тижорий ва маркетинг нуқтаи назаридан салоҳиятини янада ривожлантиришига ишонч билдирмоқда.
