Криштиану Роналду соғлиқни сақлаш соҳасига йирик сармоя киритди
Саудия Арабистонининг «Ан Наср» клуби ва Португалия терма жамоаси юлдузи Криштиану Роналду соғлиқни сақлаш ҳамда соғлом турмуш тарзига мўлжалланган янги авлод рақамли операцион тизими — Pro2col Software лойиҳасига йирик сармоя киритди.
Herbalife компаниясининг расмий сайтида эълон қилинган хабарга кўра, афсонавий футболчи мазкур технологияга эгалик қилувчи «HBL Pro2col Software» шўъба корхонасининг 10 фоиз акциясини сотиб олган. Ушбу битим қиймати 7,5 миллион долларни ташкил этди.
Pro2col тизими Herbalife дистрибьюторларига мижозлар билан алоқаларни яхшилаш ҳамда уларни қўллаб-қувватлаш учун кенгайтирилган таҳлилий воситаларни тақдим этади. Мазкур технология ёрдамида шахсийлаштирилган овқатланиш ва соғломлаштириш дастурлари янада қулай ва осон оммалашаётган кўринишга келтирилади.
Қайд этиш жоизки, Криштиану Роналдунинг Herbalife бренди билан муваффақиятли ҳамкорлиги 2013 йилдан буён давом этиб келмоқда.
