Крис Смоллинг «Порту» футболчисига айланди
«Манчестер Юнайтед»нинг собиқ ҳимоячиси Крис Смоллинг «Порту» клуби билан шартнома имзолади. Бу ҳақда Португалия клубининг матбуот хизмати хабар берди.
Футболчи билан шартнома жорий мавсум охирига қадар мўлжалланган бўлиб, унда келишувни яна бир йилга узайтириш имконияти ҳам мавжуд. 36 ёшли футболчи «Порту»га эркин агент сифатида қўшилди.
2026 йил 1 июль куни Смоллинг Саудия Арабистонининг «Ал-Файҳа» клуби билан шартномасини якунлаган эди. У сўнгги икки мавсумни ушбу жамоада ўтказди.
Крис Смоллинг 2010 йилдан 2020 йилгача «Манчестер Юнайтед» сафида тўп тепган. У инглиз клуби таркибида жами 323 та ўйин ўтказиб, 18 та гол урган. Transfermarkt маълумотларига кўра, ҳимоячининг бозор қиймати 1 миллион еврони ташкил этади.
Шунингдек, ҳимоячи «Фулхэм» ва «Рома» клубларида ҳам фаолият юритган. У Англия миллий терма жамоаси сафида 31 та учрашув ўтказиб, 1 та гол урган.
