Коулмен 17 йиллик фаолиятидан сўнг «Эвертон»ни тарк этади
Шеймус Коулман ёзда Эвертон клубини тарк этади. Бу ҳақда клубнинг расмий сайти хабар берди.
37 ёшли ирландиялик ҳимоячи жорий мавсум якунида жамоа билан хайрлашади. Клуб баёнотида таъкидланишича, Коулман «Эвертон» тарихидаги энг буюк ўйинчилар ва сардорлардан бири сифатида 17 йилдан ортиқ давом этган фаолиятини шартномаси келаси ой тугаши билан якунлайди.
Мухлислар севимлиси бўлган футболчи 2009 йил январь ойида Дэвид Мойес даврида “Слайго Роверс” жамоасидан атиги 60 минг фунт стерлинг эвазига «Эвертон»га ўтган эди. Энди у ёзни келгуси фаолияти борасида қарор қабул қилишга бағишлайди. Ҳимоячи клубда мураббийлик фаолиятини бошлаши ёки бошқа жамоада, шунингдек Ирландия терма жамоасида ўйнашни давом эттириши мумкин.
«Эвертон»нинг замонавий афсонаси сифатида тан олинган Коулман мухлислар, жамоадошлар ва клуб ходимлари орасида катта ҳурматга эга. У майдонда ҳам, ундан ташқарида ҳам етакчилик фазилатлари ва профессионал муносабати билан ажралиб туради. Шунингдек, у клуб тарихида Англия Премьер-лигасида энг кўп — 372 та ўйин ўтказган футболчи ҳисобланади.
