Кот-д'Ивуар терма жамоаси ҳужумчиси Элие Ваи келишилган ўйинлар бўйича гумон қилинмоқда
Кот-д'Ивуар терма жамоаси ҳужумчиси Элие Ваи келишилган ўйинни ташкиллаштиришда иштирок этганлик гумони билан Франция полицияси томонидан ҳибсга олинди. Бу ҳақда The Athletic нашри хабар бермоқда. Германиянинг «Айнтрахт» клубига тегишли бўлган ва ижара асосида «Ницца» сафида тўп сураётган 23 ёшли футболчи Лига 1 доирасидаги «Сент-Этьен»га қарши кечган учрашувдан (4:1) сўнг қўлга олинган. Мазкур баҳсда у дубль қайд этишга улгурган эди.
Манбанинг хабар беришича, Франция Профессионал футбол лигаси (LFP) 17-май куни бўлиб ўтган «Ницца» ва «Мец» учрашувидаги шубҳали тикилган гаровлар, хусусан, Вайининг сариқ карточка олиши бўйича маълумотларни олганидан сўнг суриштирув ишларини бошлаган. Ўша ўйиннинг 35-дақиқасида ҳужумчи қўпол ўйнагани учун огоҳлантириш олган эди. Ушбу сариқ карточка унинг мавсумдаги бешинчиси бўлгани сабабли, у «Сент-Этьен»га қарши дастлабки плей-офф баҳсини ўтказиб юбормасликка мажбур бўлган. Футболчи сўроқ қилинганидан сўнг қўйиб юборилган, аммо суриштирув ишлари давом этмоқда.
«Франция Лига 1 мусобақасида тўп сураётган 23 ёшли футболчи Марсель прокуратураси томонидан уюшган фирибгарлик, спортдаги уюшган коррупция ва жиноий фаолиятдан олинган даромадларни легаллаштириш айбловлари бўйича бошланган тергов доирасида 29-май куни ҳибсга олинганини тасдиқлаймиз. У полиция маҳкамасида сўроқ қилинганидан сўнг қўйиб юборилди. Тергов ҳаракатлари давом этмоқда», — дея Марсель прокуратураси вакилининг сўзларини келтирмоқда The Athletic.
Таъкидлаш жоизки, Элие Ваи ушбу шубҳали ўйиндан тўрт кун аввал, яъни 15-май куни Кот-д'Ивуар терма жамоасининг ЖЧ-2026 учун қайдномасига киритилган эди. АҚШ, Канада ва Мексика майдонларида ўтаётган турнирда у Эквадорга қарши учрашувда (1:0) асосий таркибда майдонга тушиб, 55 дақиқа ҳаракат қилди ва рақиб дарвозаси тўсинини нишонга олди. Кот-д'Ивуарликлар навбатдаги ўйинни шанба куни Торонто шаҳрида Германия терма жамоасига қарши ўтказишади. Маълумот учун, ҳужумчи аввалроқ Франция ёшлар терма жамоасида ўйнаган бўлиб, жорий йилнинг март ойида спорт фуқаролигини ўзгартирган эди.