Конор Макгрегор Холлоуэйга қарши жангда қандай жароҳат олганини айтди ва қачон қайтишига шама қилди
Ярим енгил ва енгил вазн тоифаларида собиқ UFC чемпиони, ирландиялик Конор Макгрегор UFC 329 турнирида америкалик Макс Холлоуэйга қарши кечган реванш жангда олган жароҳати тафсилотлари билан ўртоқлашди, шунингдек, октагонга қачон қайтиши мумкинлигини маълум қилди.
"Янги маълумот: бу тиззанинг олд қисмини боғлайдиган хачсимон пай (ACL) ва мениск жароҳати экан — худди Холлоуэй билан биринчи жангимиз олдидан бўлган жароҳатнинг ўзи, фақат энди иккинчи оёғимда. Бу анча ҳайратланарли ҳолат.
Ўшанда мен спортга тўққиз ойдан кейин қайтиб, Брандао билан жанг қилгандим. Регенератив тиббиётнинг бугунги ютуқлари ва такомиллашган машғулот усулларини ҳисобга олсак, келаси йилнинг ёзигача қайтишим мутлақо реал ҳақиқатдир.
Ҳозирданоқ қўлтиқтаяқсиз юра бошладим. Куни кеча тренажёрда оёқларни ростлаш машғини ҳеч қандай муаммосиз бажардим. Яъни, ёрдамсиз юра оляпман ва квадрисепсни юклама остида ишга тушира оляпман. Буларнинг барчаси жуда ижобий белги.
Жанг якунланганидан бери максимал даражада тартиб-интизомни сақлаб келяпман. Менимча, бу ҳолат мени бундан ҳам жиддийроқ кўнгилсизликдан асраб қолди. Агарда ғалаба қозониб, ўша "бош қаҳрамон" мақомида байрамона кечага (afterparty) борганимда, барчаси нима билан тугашини ким билар эди? Ўйлайманки, мени асрашди. Худога шукур! Олдинга ҳаракат қилишда давом этамиз. Қўллаб-қувватлаганингиз ва илиқ сўзларингиз учун барчага раҳмат. Саломатлигингиз — сизнинг бойлигингиздир", — деб ёзди Макгрегор ўзининг X ижтимоий тармоқдаги саҳифасида.
Эслатиб ўтамиз, Конор ва Макс ўртасидаги жанг ўшанда турнирнинг марказий воқеаси бўлган ва Холлоуэйнинг биринчи раунддаги техник нокаут эвазига қозонган ғалабаси билан якунланганди.
