Компания Бельгияда йилнинг энг яхши мураббийи деб топилди
Мюнхеннинг «Бавария» клуби бош мураббийи Венсан Компания илк бор Реймонд Гёталс совринига сазовор бўлди. Ушбу мукофот йилнинг энг яхши бельгиялик мураббийига топширилади. Иккинчи ўрин «Брюгге» устози Ники Хайен ва «Монако» бош мураббийи Себастьян Поконоли ўртасида бўлинди.
«Бу — мен учун беқиёс шараф. Ушбу мукофот жуда катта аҳамиятга эга, айниқса, илгари уни қўлга киритган мураббийлар номларини ва совриннинг тарихини билганимда. Реймонд ҳанузгача наfaқат ҳар бир бельгиялик мураббий, балки бутун дунё бўйлаб кўплаб мутахассислар учун намуна бўлиб қолмоқда», — деди Компания.
Венсан Компания Германиянинг машҳур клубига 2024 йил май ойида келиб қўшилган. 2024/2025 йилги мавсумда «Бавария» унинг бошчилигида 82 очко тўплаб, Германия Бундеслигасида чемпионликни қўлга киритди. Жорий мавсумда ҳам мюнхенликлар ишончли ҳаракат қилмоқда — 14 турдан сўнг 38 очко билан турнир жадвалида пешқадамлик қилмоқда.
