“Комо” Ассане Диаони 2031-йилгача жамоада сақлаб қолмоқчи
“Комо” 20 ёшли вингер Ассане Диао билан амалдаги шартномани узайтиришни режалаштирмоқда. Инсайдер Николо Скиранинг маълумотига кўра, Италия клуби сенегаллик футболчига 2031-йилгача мўлжалланган янги келишув таклиф қилмоқчи.
“Комо” ёзги трансфер ойнасида Диаога бўлган жиддий қизиқишга қарамай, уни жамоада сақлаб қолди. Клуб АПЛдан 40 миллион евро атрофидаги трансфер вариантини, шунингдек, А Сериянинг бошқа жамоаларидан келган таклифларни рад этган.
Клуб раҳбарияти ёш вингерни узоқ муддатли лойиҳа учун муҳим футболчилардан бири сифатида кўрмоқда. Диаонинг амалдаги шартномаси 2029-йил ёзигача мўлжалланган бўлса-да, “Комо” уни яна икки йилга узайтиришни истамоқда.
Маълумот учун, Диао жорий мавсум А Серияда 3 та учрашувда майдонга тушиб, 2 та гол урган ва 1 та голли узатмани амалга оширган.
