Коке фаолиятини МЛСда давом эттириши мумкин
Мадриднинг «Атлетико» клуби сардори Коке фаолиятини АҚШнинг МЛС чемпионатида давом эттириши мумкин. Бу ҳақда инсайдер Маттео Моретто Radio Marca эфирида маълум қилди.
Манбага кўра, «Атланта Юнайтед» раҳбарияти тажрибали ярим ҳимоячининг вакиллари билан эҳтимолий трансфер бўйича алоқа ўрнатган.
Қайд этилишича, келишув амалга ошиши энди фақат футболчининг шахсий қарорига боғлиқ.
Жоржия штати вакили бўлган клуб Кокени жорий ёзги трансфер ойнасидаёқ ўз сафига қўшиб олишни режалаштирмоқда.
Коке «Атлетико» асосий жамоасидаги дебютини 2009 йил 19 сентябрь куни ўтказган. Шундан буён у мадридликлар сафида 740 та учрашувда майдонга тушиб, 50 та гол урди ва 122 та голли узатма муаллифи бўлди.
Унинг «Атлетико» билан амалдаги шартномаси 2026 йил 30 июнга қадар амал қилади.
Айни пайтда «Атланта Юнайтед» МЛС Шарқий конференцияси турнир жадвалида 14-ўринни эгаллаб турибди. Жамоа сафида россиялик ярим ҳимоячи Алексей Миранчук ҳам тўп сурмоқда.