Клублар ўртасидаги жаҳон чемпионатида ишлайдиган ҳакам Илгиз Танташев ҳақида нималарни билиш керак?
Ёзда АҚШда Клублар ўртасидаги Жаҳон чемпионати баҳслари бўлиб ўтади. Куни кеча ушбу мусобақада ишлайдиган ҳакамлар номи эълон қилинди. Улар орасида ўзбекистонлик ФИФА ҳаками Илгиз Танташев ҳам бор. Хўш, бу ҳакам ҳақида нималарни билиш керак?
Илгиз Танташев 1984 йилнинг 5 апрель санасида Бухорода туғилган. Отаси ўз вақтида ўрта даражадаги футболчи бўлган. Шу боис Илгиз футбол муҳитида катта бўлган ва 7 ёшдан қўшни бола билан бирга футбол мактабига боришни бошлаган. Ёшликда фақат футболчи бўлишни орзу қилган ва сўнгги ҳимоячи бўлиб ўйнаган. Шавкат Саломов ва Илдар Магдеев каби профессионал футболчилар билан бирга ўйнаган. 15 ёшида ўнг оёғининг сон қисмидан жиддий жароҳат олган ва узоқ муддат даволанишга мажбур бўлган. Жароҳатдан қутулганидан кейин ўнг оёқда кучли зарба бера олмай қолганди. Профессионал футболчи бўла олмагач институтга ўқишга кирган. Ўқишдан бўш вақтларда автомобиль тузатиш сервисида ишлаган. Кунлардан бирида собиқ ҳакам Ноил Лутфуллин ўз машинасини тузатишга олиб келади ва футбол мактаби орқали таниш бўлган Илгизни кўриб қолади. Футболчилик фаолиятини тугатганини билган Ноил Лутфуллин унга болалар футболида ҳакамлик қилишни таклиф қилган. 20 ёшдан болалар футболида ҳакамлик қилишни бошлаган эди.
2005 йилдан Ўзбекистон биринчи лигасида қанот ҳаками сифатида ишлай бошлаган. 2008 йилгача қанот ҳакамида фаолият олиб борган. Ундан кейин икки йил ҳам бош ҳакам, ҳам қанот ҳаками бўлиб ишлаган. 2010 йилдан эса фақат бош ҳакамга айланганди.
2010 йилдан Ўзбекистон олий лигасида (Суперлига) бош ҳакам сифатида дебют қилган ва ўша мавсум 3 та баҳсда ишлаган. Бугунга келиб Танташев Ўзбекистон олий лигасида 150 дан зиёд ўйинда фаолият олиб борган.
2014 йилдан Танташев ФИФА ҳакамига айланган ва халқаро ўйинларда ишлашни бошлаган. Унинг биринчи халқаро учрашуви Осиё чемпионлар лигаси доирасидаги "Бейжинг Гуан" (Хитой) - "Чонбури" (Жанубий Корея) учрашуви бўлган. Ўша баҳсда захира ҳаками бўлган. Бош ҳакам сифатидаги илк халқаро ўйини эса ОФК кубоги доирасидаги "Ал Қодисия" (Кувайт) - "Ал Хидд" (Баҳрайн) бўлган.
Бу ҳакам 2016 йилда Қатар мезбонлик қилган U-23 Осиё кубоги финал босқичида ишлади. Танташев гуруҳ босқичида иккита ва 1/4 финалда битта учрашувда бош ҳакам бўлган.
2019 йил фаолиятида илк бор катталар ўртасидаги Осиё кубоги финал босқичида ишлаш имкониятига эга бўлди. БААда ўтган қитъа чемпионатида Танташев гуруҳ босқичи доирасидаги Ҳиндистон - Баҳрайн учрашувини бошқариб борган.
Танташев 2019 йил Польшада ўтган U-20 Жаҳон чемпионатида ишлайдиган ҳакамлар рўйхатидан ҳам жой олди. Бироқ ўша мундиалда Илгиз иккита учрашувда фақат захира ҳаками бўлиб ишлади холос.
2019 йил охирида Илгиз Танташев бошчилигидаги ҳакамлар бригадаси Ўзбекистон Лига кубоги финал учрашувида ишлаган.
2020 йил Суперлиганинг 1-туридан ўрин олган "Пахтакор" - "Навбаҳор" учрашувидаги қарорлари туфайли 4 ой муддатга ҳакамликдан четлатилган эди. Ўша четлатишдан кейин ҳаттоки фаолиятини якунлаш ҳақида жиддий ўйлаган.
2024 йил бошида Қатарда ўтган Осиё кубогида жами 7 та учрашувда ишлаган. Улардан 3 таси бош ҳакам сифатида, қолган 4 тасида захира ҳаками сифатида. Иордания ва Қатар ўртасидаги мусобақанинг финал баҳсида Танташев захира ҳаками бўлган.
2024 йил ОФК Танташевни қитъанинг энг нуфузли мусобақаси ҳисобланган Осиё чемпионлар лигаси финал учрашувига тайинлаган. Хабарингиз бўлса керак, ОЧЛ финали уй-сафар тизимида ўтади ва Танташев иккинчи, яъни ҳал қилувчи финалда ишлаганди.
2024 йил Парижда ўтган Олимпиадада жами 4 та ўйинда бош ҳакам бўлган. Чорак финал доирасидаги Франция - Аргентина ва ярим финал доирасидаги Марокаш - Испания учрашувлари шулар жумласидан. Ярим финалнинг 11-дақиқасида оёғидан жиддий жароҳат олган ва учрашувни охиригача етказа олмаганди.
Бугунги кунда Танташев ўз ёрдамчилари Тимур Гайнуллин ва Андрей Цапенко билан бирга АҚШда ўтадиган ФИФА клублар ўртасидаги Жаҳон чемпионатига тайёргарликни давом эттиришмоқда. Мундиал 14 июнь куни старт олади.