Киран Маккенна «Ипсвич Таун»ни тарк этиши мумкин
«Ипсвич Таун» бош мураббийи Киран Маккенна жамоани тарк этиши кутилмоқда. Бу ҳақда The Sun нашри хабар бермоқда.
Аввалроқ «тракторчилар» ушбу мутахассис қўл остида Чемпионшип турнир жадвалида иккинчи ўринни эгаллаб, Англия Премьер-лигасига йўлланмани қўлга киритган эди. Манба берган маълумотга кўра, юқори дивизионнинг бир қатор клублари мураббийга қизиқиш билдирмоқда. «Ипсвич Таун» Маккенна билан хайрлашишни истамаяпти, бироқ аллақачон унинг ўрнини босиши мумкин бўлган номзодларнинг қисқа рўйхатини (short-list) шакллантирган.
Маккеннанинг фаолиятини давом эттириши учун энг эҳтимолий йўналиш сифатида «Кристал Пэлас» кўрилмоқда. Мазкур клубни ёзда Оливер Гласнер тарк этади. Бироқ «бурғутлар» номзодлар орасида Андони Ираолани ҳам кўриб чиқишлари мумкин. Басклар юрти вакили бўлган ушбу мутахассис ёзда «Борнмут»дан кетиши кутилмоқда.
