Килиан Мбаппенинг онаси Францияда сўроқ қилинди
Мадриднинг «Реал» клуби ҳужумчиси Килиан Мбаппенинг онаси Файза Ламари Францияда коррупция билан боғлиқ тергов доирасида сўроқ қилинди. У Франция терма жамоаси хавфсизлик хизматининг собиқ раҳбари Муҳаммад Санҳажий билан алоқалари юзасидан терговчиларнинг саволларига жавоб берган. Бу ҳақда L’Équipe нашри хабар бермоқда.
Манбага кўра, Файза Ламари Санҳажийдан тўрт кишига виза олишда ёрдам сўраганликда гумон қилинмоқда. Шу сабабли у 9 октябрь куни Парижда уч нафар тергов судьяси томонидан сўроқ қилинган. Айни пайтда Мбаппенинг онасига расман айблов эълон қилинмаган. У тергов жараёнида махсус ҳуқуқий мақомга эга гувоҳ сифатида иштирок этмоқда.
Тергов доирасида Килиан Мбаппенинг ўзи ҳам 30 сентябрь куни полиция томонидан сўроқ қилинган. Ҳуқуқ-тартибот идоралари футболчининг 2023 йилда Муҳаммад Санҳажийга ўтказган 60 300 евролик тўловини ўрганмоқда. Шунингдек, Мбаппе ва Санҳажийнинг Камерунга биргаликда қилган сафари ҳам текширувга сабаб бўлган. Терговчилар собиқ хавфсизлик ходими шахсий хизматлари учун ҳақ олган-олмаганини аниқлашга ҳаракат қилмоқда.
Маълумот учун, Муҳаммад Санҳажий 2004 йилдан 2026 йилгача Франция терма жамоаси хавфсизлик тизимида фаолият юритган. У 16 сентябрь куни давлат маблағларини ўзлаштириш билан боғлиқ маблағларни қабул қилишда гумон қилиниб, расман тергов остига олинган. Ҳозирча Килиан Мбаппе ва унинг онасининг мазкур ишда айбдорлиги аниқланмаган.
