Килиан Мбаппе «Реал» шифокорларига ишонмайди ва соғайиб кетмагунча майдонга қайтмоқчи эмас — манба
Мадриднинг «Реал» клуби ва Франция терма жамоаси юлдузи Килиан Мбаппе тиззасидаги жароҳатни даволаш жараёнида клуб шифокорларига бўлган ишончини йўқотди. Footmercato ва Cadena SER нашрларининг хабар беришича, 27 ёшли ҳужумчи тўлиқ тузалмагунча майдонга тушмасликка қарор қилган.
Мбаппе тиззасидаги боғламлар чўзилиши билан боғлиқ муаммолар 2025 йилнинг декабрь ойидан буён кузатилмоқда. Клуб тиббий хизмати вазиятни жиддий эмас, деб ҳисоблаб, консерватив даволашни тавсия қилган бўлса-да, футболчи ушбу ёндашувдан қониқмаган. Ўз соғлиғи устидан назоратни қўлга олиш мақсадида, Килиан ўтган ҳафта клуб рухсати билан Парижга йўл олиб, франциялик мутахассислар маслаҳатига мурожаат қилди.
ОАВ маълумотларига кўра, клуб раҳбарияти ва тиббий штаби футболчининг майдонга қайтишини кутяптиган бир пайтда, Мбаппе жароҳатнинг қайтадан такрорланишидан хавотирда. Унинг асосий мақсади — 2026 йил ёзида бўлиб ўтадиган Жаҳон чемпионатида энг яхши спорт формасида иштирок этиш. Шу боис, Килиан хавфга йўл қўймаслик учун халқаро миқёсдаги энг яхши шифокорлар назоратида бўлишни маъқул кўрмоқда.
Килиан Мбаппе жорий мавсум «Реал» сафида барча мусобақаларда 33 та учрашувда майдонга тушиб, 38 та гол уришга ва 6 та голли узатмани амалга оширишга эришган. У 2024 йилдан буён «Қироллик клуби» шарафини ҳимоя қилиб келмоқда.
Ҳозирча клуб расман Мбаппенинг майдонга қайтиш муддатларини эълон қилгани йўқ, бироқ футболчи тез орада Франция терма жамоаси йиғинига бориши кутилмоқда.
