Келишилган ўйинларга қарши кураш бўйича семинар ўтказилди
Сўнгги йилларда ЎФА ҳамда ЎзПФЛ томонидан тотализатор ва келишилган ўйинлар каби иллатларга қарши кураш юқори босқичга чиқди. Бу каби қингирликларнинг олдини олиш бўйича ҳам кўплаб жиддий ишлар амалга оширилмоқда. Бугун ҳалол ўйин принципларига амал қилмаётган инсонлар тегишли тартибда жазоланаётгани ҳеч кимга сир эмас.
Куни кеча ЎФА махсус инспекцияси мутасаддилари одатдагидек, янги мавсум олдидан Анталияда қишки ўқув-йиғин машғулотларини ўтказаётган бош жамоамиз аъзолари учун онлайн тарзда семинар ўтказди. Семинар давомида расмий мусобақаларда иштирок этадиган “Бунёдкор” футбол клуби жамоаларининг ҳеч бири шу кунга қадар бу каби қингир ишларга аралашмагани, ҳатто шубҳаланишга ҳам асос йўқлиги алоҳида таъкидланди. Шундай бўлса-да, турли хил ваъдаларга алданиб, келишилган ўйинларга йўл қўймаслик зарурлиги, унинг салбий оқибатлари ва қўлланиладиган чоралар тўғрисида тушунчалар берилди.
