Kelishilgan o‘yinlarga qarshi kurash bo'yicha seminar o‘tkazildi
So‘nggi yillarda O‘FA hamda O‘zPFL tomonidan totalizator va kelishilgan o‘yinlar kabi illatlarga qarshi kurash yuqori bosqichga chiqdi. Bu kabi qing‘irliklarning oldini olish bo‘yicha ham ko‘plab jiddiy ishlar amalga oshirilmoqda. Bugun halol o‘yin prinsiplariga amal qilmayotgan insonlar tegishli tartibda jazolanayotgani hech kimga sir emas.
Kuni kecha O‘FA maxsus inspeksiyasi mutasaddilari odatdagidek, yangi mavsum oldidan Antaliyada qishki o‘quv-yig‘in mashg‘ulotlarini o‘tkazayotgan bosh jamoamiz a’zolari uchun onlayn tarzda seminar o‘tkazdi. Seminar davomida rasmiy musobaqalarda ishtirok etadigan “Bunyodkor” futbol klubi jamoalarining hech biri shu kunga qadar bu kabi qing‘ir ishlarga aralashmagani, hatto shubhalanishga ham asos yo‘qligi alohida ta’kidlandi. Shunday bo‘lsa-da, turli xil va’dalarga aldanib, kelishilgan o‘yinlarga yo‘l qo‘ymaslik zarurligi, uning salbiy oqibatlari va qo‘llaniladigan choralar to‘g‘risida tushunchalar berildi.
