Кейнга Европанинг топ-клублари қизиқмоқда
«Бавария» ҳужумчиси Харри Кейннинг келажаги Европанинг бир қатор етакчи клублари диққат марказида қолмоқда. TEAMtalk маълумотига кўра, вазиятни «Барселона», «Реал», «Манчестер Юнайтед», «Челси» ва «Манчестер Сити» яқиндан кузатиб бормоқда.
Шунга қарамай, Мюнхен клуби раҳбарияти англиялик тўпурарнинг эҳтимолий кетишидан хавотирда эмас. Клубдагилар Кейн яқин вақт ичида янги шартнома имзолашига ишонмоқда. Унинг вакиллари билан музокаралар бир неча ойдан буён давом этаётган бўлиб, раҳбарият келишувга эришиш фақат вақт масаласи эканини таъкидламоқда.
Хабар қилинишича, янги битим жорий йил охири ёки келаси йилнинг январь ойида расмийлаштирилиши кутилмоқда. 32 ёшли ҳужумчининг амалдаги шартномаси 2027 йилнинг ёзига қадар мўлжалланган.
Бу жараённи «Тоттенхэм» ҳам диққат билан кузатмоқда. Чунки Кейн трансфери вақтида тузилган келишувга кўра, Лондон клуби ўзининг собиқ сардори билан боғлиқ вазият ҳақида маълумот олиш ҳуқуқига эга.
Шунингдек, Саудия Про-лигаси клублари ҳам англиялик форвардга қизиқиш билдирмоқда. Бироқ Кейн ҳозирча Яқин Шарққа кўчиб ўтишни режалаштираётгани йўқ. Агар у келажакда Европани тарк этишга қарор қилса, унинг асосий танлови АҚШнинг МЛС чемпионати бўлиши мумкин. Аммо бу сценарий ҳозирча яқин истиқболда кўриб чиқилаётгани йўқ.
