Кассано: «Ҳаммаси тугади»
Италия терма жамоаси ва «Милан»нинг собиқ ҳужумчиси Антонио Кассано А Сериянинг 24-туридан ўрин олган «Милан» — «Комо» (1:1) учрашувидан сўнг ўз фикрлари билан ўртоқлашди. У жорий мавсумда «Интер» чемпионликни қўлга киритишга ишонч комил эканини таъкидлади.
«Бу ўйинда ҳар икки дарвозабон бир-бирига гол совға қилди. Ушбу вазиятлар оралиғида «Комо» ижросида кўплаб сифатли ҳужумлар ва мазмунли ўйинни кўрдик. «Милан»да эса, одатдагидек, тартибсизлик ҳукмрон, бунга ҳеч нарса қилиб бўлмайди. «Милан»дек жамоанинг шундай ўйин кўрсатишда давом этаётганига ишона олмайман», — дея унинг сўзларини келтиради Pianeta Milan.
Кассано турнир жадвалидаги ҳолатга ҳам тўхталиб ўтди:
«Энди «Интер» етти очкога олдинлаб кетди, уларни қувиб етиш жуда ва жуда қийин бўлади. Назаримда, ҳаммаси тугади. Биринчи кундан айтганимдек: эҳтиёт бўлинг, «Милан» бошқа жамоалар билан бир гуруҳ бўлиб қолмасин, чунки рақиблар яқинлашиб келмоқда. Олдинда жамоани 3-4 та қийин сафар учрашуви, жумладан, дерби кутяпти».
Айни дамда «Милан» 25 та ўйиндан сўнг 54 очко билан Италия чемпионатида иккинчи ўринни эгаллаб турибди. Биринчи ўринда бораётган «Интер» билан фарқ етти очкони ташкил этмоқда.
