Каррагер «Ливерпуль»нинг трансфер сиёсатига кескин танқид йўллади
«Ливерпуль»нинг собиқ ҳимоячиси, бугунги кунда таниқли эксперт Жейми Каррагер клубнинг трансфер сиёсатига яна бир бор ўткир танқид остига олди. Бу галги асосий эътирозлар жамоага катта маблағ эвазига келган ҳужумчи Александр Исак ва яримҳимоячи Флориан Виртсга қаратилди. The Athletic нашрининг ёзишича, Каррагер «Ливерпуль»ни ўз трансфер мақсадларини танлашда уқувсизликда айблаган.
Экспертнинг фикрича, клуб омадсиз харидлар учун ҳаддан ташқари кўп пул сарфлаб юборган. Каррагер ўз чиқишида таркибдаги номутаносибликни алоҳида таъкидлади:
«Менинг калламга сиг‘майдиган нарса — қандай қилиб 125 миллион фунтлик ва 69 миллион фунтлик икки ҳужумчини битта жамоада бирлаштириш мумкин?», — дея ҳайронлигини яширмади собиқ футболчи.
Александр Исакнинг «Ливерпуль»даги кўрсаткичлари ҳақиқатдан ҳам саволлар туғдирмоқда: у жами 16 та ўйинда майдонга тушиб, бор-йўғи 3 та гол ва 1 та самарали узатмага муаллифлик қилди. Бунинг устига, 2025 йил декабр ойида «Тоттенхэм»га қарши баҳсда оёғидан оғир жароҳат олган швед ҳужумчиси айни дамда узоқ муддатли реабилитация жараёнини ўтамоқда.
Германиялик иқтидор Флориан Виртс ҳам «Байер»дан 125 миллион евро эвазига трансфер қилинганига қарамай, ҳозирча ўзини кўрсата олмади. Унинг ҳисобида 30 та учрашувда 4 та гол ва 7 та голли узатма бор. Каррагернинг фикрича, бундай астрономик суммалар эвазига келган футболчилар жамоа ўйинига кўпроқ таъсир ўтказишлари лозим эди.
