Карлуш Кейруш Гана терма жамоаси бош мураббийлигидан кетганини эълон қилди
Португалиялик таниқли мутахассис Карлуш Кейруш ижтимоий тармоқлардаги шахсий саҳифалари орқали Гана миллий терма жамоаси бош мураббийлигидан истеъфога чиққанини маълум қилди.
«Гана халқига мурожаат қилмоқчиман. Футбол ҳам худди ҳаёт каби бизга битта абадий сабоқни ўргатади: сен ёки ғалаба қозонасан, ёки ўрганасан.
Мен ушбу йўлни биз эришган натижалардан фахрланган ҳолда, шу билан бирга — доимо кўпроғига интиладиган инсонларга хос соғлом қониқмаслик ҳисси билан якунламоқдаман. Юқорироқ даражага чиқиш ҳеч қачон якуний мақсад бўлмаслиги керак — у янада улкан мақсадлар сари бошланғич нуқтага айланиши лозим.
"Қора юлдузлар"нинг келажаги фақатгина футбол майдонида қурилмайди. Бу жамоанинг муваффақияти майдон ташқарисидан — Гананинг ажойиб футбол талантларини тайёрлаш, ҳимоя қилиш ва ривожлантириш учун имкони борича энг яхши шароитларни яратишдан бошланиши керак.
Футбол федерацияси президенти ва раҳбариятига — Гана миллий терма жамоасига хизмат қилиш имкониятини берганлари учун катта ташаккур айтаман. Бу мамлакат ва "Қора юлдузлар"га хизмат қилиш мен учун шараф ва имтиёз бўлди. Футболчиларим ҳамда мураббийлар штабига — жасоратингиз, фидойилигингиз ва ўз ишингизга бўлган содиқлигингиз учун чуқур миннатдорчилик билдираман.
Мухлисларга эса шуни айтмоқчиман: биз спорт натижаларидан тўлиқ қониқиш ҳосил қилмаган бўлсак-да, Гана рангларини муносиб ҳимоя қилганимизни ҳамда энг буюк футбол аренасида "Қора юлдузлар"га бўлган ҳурмат ва нуфузни қайтарганимизни фахр билан айта оламиз.
Раҳмат, Гана. Йўл энди бошланмоқда», — дейилади Кейрушнинг баёнотида.
Эслатиб ўтамиз, ЖЧ-2026 гуруҳ босқичида Гана терма жамоаси Панамани мағлуб этган (1:0), Англия билан дуранг ўйнаган (0:0) ва Хорватияга имкониятни бой берган эди (1:2). Мусобақанинг 1/16 финал босқичида эса жамоа Колумбия термасидан мағлубиятга учраб (0:1), турнирдаги иштирокини якунлаган эди.