Карим Бензема Ла Лигага қайтиши мумкин — «Бетис» уни ўз сафига қўшмоқчи
Саудия Арабистонининг «Ал-Ҳилол» клуби ҳужумчиси Карим Бензема фаолиятини яна Испанияда давом эттириши мумкин. ElGolDigital маълумотига кўра, «Реал Бетис» 38 ёшли франциялик футболчини ўз сафига қўшиб олиш имкониятини кўриб чиқмоқда.
Трансфер амалга ошиши учун Бензема аввало «Ал-Ҳилол» билан шартномасини бекор қилиб, эркин агентга айланиши керак. Севилья клуби айнан шундай ҳолатда футболчи билан музокара бошлаши кутилмоқда. Шунингдек, Бензема «Бетис»га ўтиши учун Саудия Арабистонидаги маошига нисбатан анча камроқ маошга рози бўлиши керак бўлади.
«Ал-Ҳилол» эса ҳужум чизиғига янги футболчи олиб келишни режалаштирмоқда. Хабарларга кўра, Саудия клуби «Астон Вилла» ҳужумчиси Олли Уоткинс вариантини кўриб чиқмоқда. Шу сабаб Бенземанинг жамоадан кетиши эҳтимоли пайдо бўлган. Бироқ футболчига яқин манбалар унинг ҳозирча «Ал-Ҳилол»ни тарк этиш нияти йўқлигини ҳам билдирмоқда.
Маълумот учун, Бенземанинг «Ал-Ҳилол» билан амалдаги шартномаси 2027 йил ёзигача мўлжалланган. У Саудия клубига 2026 йилда «Ал-Иттиҳод»дан келиб қўшилган ва дастлабки 13 учрашувида 9 та гол урган.
