Камолиддин Тожиев: Барчасини таҳлил қиламиз
Ўзбекистон Суперлигасининг 3-туридан ўрин олган “Пахтакор” – “Навбаҳор” (0:2) учрашувидан кейинги матбуот анжуманининг иккинчи қисмида мезбонлар бош мураббийи Камолиддин Тожиев иштирок этиб, журналистларнинг саволларига жавоб берди.
“Шерлар” устози одатдагидек, ўз сўзини учрашув ҳақидаги фикрлари билан бошлади.
- Ўйинни яхши бошлай олмадик. Балки майдонни тозалаш кераклиги учун кўп кутиб қолиб кетгандирмиз. Иккинчи бўлимда ўзимизга иккита гол олиб келдик. Йигитларни танимадим, эртага буни таҳлил қилиб чиқамиз ва хулосалар чиқарамиз.
- Бугунги мағлубиятдан сўнг, Суперкубок финалидаги имкониятлар пасайиб кетмайдими?
- Йўқ. Финал битта ўйиндан иборат. Билмайман, бугун бизга нима бўлди? Барчасини таҳлил қиламиз.
- Дастлабки икки турда Ҳамдамов ва Пажишекни захирадан майдонга туширган эдингиз. Бугун эса полшалик ҳужумчини асосий таркибда кўрдик. Ушбу қарор ўзини қанчалик оқлади?
- Бугун бутун жамоа яхши ўйнай олмади. Нима бўлганини билмайман, очиғи. Шунинг учун таҳлил қилиб чиқамиз, деб айтяпман.
- “Пахтакор” бугун рақибдан ўйиннинг барча жабҳаларида орқада қолганини тан оласизми? Балки қайсидир жиҳатлар бўйича жамоангиз яхшироқ бўлгандир?
- Барча аспектларда демаган бўлардим. Ўзимизга йўқ жойдан иккита гол олиб келдик. Нега пенальти олиб келганимизни билмайман. Бошқа кўзга кўриниши мумкин бўлган вазият бўлмади.
- Сергев ва Ҳамробековни “Пахтакор”да кўришимиз мумкинми? Агар ФИФА рухсат берса?
- Кўрамиз. Биринчи навбатда ФИФА бундай имкониятни тақдим этиши керак. Шундан сўнг музокара олиб борамиз.
- Пенальти белгиланишидан олдин ҳам Ибрагимов қоида бузган эди. 11 метрлик жарима зарбаси ҳам унинг хатоси туфайли белгиланди. Ибрагимовни захирага олишга кечикдим деб ўйлайсизми? У бугунги ўйинда биоз асабийлашиб кетгандек туюлди...
- Ибрагимов биоз асабий ўйинчи. Бу футбол. Кўриб чиқамиз ва нима рўй берганини билиб оламиз. Уни олдинроқ захирага олмоқчи эдим.
- Ноқулай об-ҳаво шароити жамоангиз ўйинига қанчалик таъсир қилди?
- Об-ҳаво икки жамоа учун ҳам бир хил эди.
- Тимур Кападзе ҳозиргина ушбу учрашувга жуда жиддий ёндашгани ҳақида айтиб ўтди. “Пахтакор”нинг бугунги мағлубиятида мураббийлар штаби қанчалик айбдор? Рақиб жамоа мураббийлар штаби айнан бугунги учрашувда ўта жиддий тайёргарлик кўрган экан...
- Бунга жавобни учрашувни таҳлил қилиб бўлганимиздан сўнг билиб оламиз.
- Иккинчи бўлимнинг бошида урилган гол ўйинга қанчалик таъсир қилди?
- Биринчи дақиқадаёқ ўз дарвозамиздан тўп ўтказиб юбордик.
- Ҳакамларнинг ишига баҳо бериб ўтсангиз?
- Бу ҳақда гапирмайман.
