Кай Хаверц Кюрасаога қарши ўйиннинг энг яхши футболчиси деб топилди
Германия терма жамоаси ҳужумчиси Кай Хаверц ЖЧ-2026 гуруҳ босқичи 1-тури доирасида Кюрасаога қарши кечган учрашувнинг (7:1) энг яхши футболчиси деб эътироф этилди. Бу ҳақда FIFA расмий сайти хабар бермоқда. Мазкур ўйинда форвард Дик Адвокат бошқарувидаги жамоа дарвозасига дубл қайд этишга муваффақ бўлди.
Ушбу баҳсдан сўнг Германия 3 очко билан «E» гуруҳи турнир жадвалида пешқадамлик қилмоқда, очкога эга бўлмаган Кюрасао эса тўртинчи ўриндан жой олган. Гуруҳнинг қолган икки жамоаси — Эквадор ва Кот-д'Ивуар терма жамоалари ўртасидаги 1-тур учрашуви 15-июн куни бўлиб ўтади.
Гуруҳ босқичининг 2-турида Германия миллий жамоаси Кот-д'Ивуар билан (20-июн), 3-турда эса Эквадор билан (25-июн) куч синашади. Кюрасао эса 2-турда Эквадор (21-июн), 3-турда эса Кот-д'Ивуар (25-июн) билан тўқнаш келади.
Маълумот учун, Жаҳон чемпионатининг гуруҳ босқичи учрашувлари 11-июндан 27-июнгача давом этади. Жамоалар ўзаро бир даврали тизимда (ҳар бири учтадан ўйин) майдонга тушишади. Плей-офф босқичига ҳар бир гуруҳдан иккитадан энг яхши терма жамоа ҳамда учинчи ўринни эгаллаган энг яхши 8 та жамоа йўл олади.
