Италиялик жаҳон чемпиони Тошкентда Шомуродов футболкасида стартга чиқди
Сузиш бўйича жаҳон чемпиони, италиялик Альберто Раццетти Тошкентда ўтказилган Жаҳон кубоги босқичида Ўзбекистон миллий терма жамоаси сардори Элдор Шомуродовнинг футболкасида кўриниш берди. Спортчи 200 метрга комплекс сузиш баҳслари олдидан Шомуродовнинг фамилияси ва 14-рақами туширилган либосда старт майдонига чиқди.
Италиялик сузувчи ушбу йўналишда 1 дақиқа 52,53 сония натижа қайд этиб, тўртинчи ўринни эгаллади. Мусобақада америкалик Шейн Касас 1:51,81 натижа билан ғолиб бўлди. Унинг ватандоши Карсон Фостер иккинчи, канадалик Финли Нокс эса учинчи ўринни қўлга киритди.
Раццеттининг ўзбекистонлик футболчи либосида кўриниш бергани маҳаллий мухлислар эътиборини тортди. Шомуродов фаолияти давомида Италиянинг “Женоа”, “Рома”, “Специя” ва “Кальяри” клубларида тўп сурган. Бироқ италиялик сузувчи нима сабабдан айнан Шомуродовнинг футболкасини танлагани ҳақида ҳозирча изоҳ бермаган.
Маълумот учун, Альберто Раццетти 2021 йилда Абу-Дабида ўтказилган қисқа масофага сузиш бўйича жаҳон чемпионатида 200 метрга баттерфлай усулида олтин медални қўлга киритган. Шунингдек, у 2024 йилги жаҳон чемпионатида 200 метрга баттерфлай йўналишида кумуш ва 200 метрга комплекс сузишда бронза медалига сазовор бўлган.
