Испаниялик мухлислар Мисрга қарши ўйинда Ислом динига нисбатан камситувчи ҳаракат қилишди
Барселона шаҳрида Испания ва Миср терма жамоалари ўртасида ўтказилган ўртоқлик учрашуви мухлисларнинг номақбул хатти-ҳаракатлари билан ёдда қолди. Мазкур баҳс 0:0 ҳисобидаги дуранг билан якунланди.
AS нашри хабар беришича, ўйин бошланишидан аввал стадионга йиғилган мухлислар Миср давлат мадҳиясини ҳуштакбозлик билан кутиб олишган. Шунингдек, учрашувнинг 20-дақиқасига келиб, «Корнелья-Эл Прат» стадионидаги томошабинларнинг бир қисми диний камситиш шиорларини баралла айтишни бошлаган. Хабарда айтилишича, мухлислар Ислом динига нисбатан камситувчи ҳайқириқлар остида сакраб, ритмик ҳаракатлар қилишган.
Таъкидлаш жоизки, Испания терма жамоасининг етакчи футболчиларидан бири, «Барселона» ҳужумчиси Ламин Ямал ҳам Ислом динига эътиқод қилади. Мухлисларнинг бундай ҳаракати спорт жамоатчилиги орасида кескин эътирозларга сабаб бўлиши кутилмоқда.
Маълумот учун, Испания миллий терма жамоаси бундан аввалги ўртоқлик учрашувида Сербия устидан 3:0 ҳисобида ишончли ғалаба қозонган эди.
