Испания Кубоги. «Барселона» сафарда «Расинг»ни мағлуб этиб, 1/4 финалга чиқди
Испания Кубоги 1/8 финалидан ўрин олган «Расинг» — «Барселона» учрашуви бўлиб ўтди. Мамлакатнинг иккинчи кучли лигасида иштирок этувчи «Расинг» ўз майдонида Каталония грандини қабул қилди. Якунда меҳмонлар 2:0 ҳисобига ғалаба қозонди.
Ўйиндаги ҳисоб 66-дақиқада «Барселона» ҳужумчиси Ферран Торрес томонидан очилди. Қўшимча вақтнинг 90+5-дақиқасида эса Ламин Ямал иккинчи голни уриб, учрашувдаги якуний натижани белгилаб берди. Шу билан бирга, ҳакам «Расинг» томонидан киритилган икки тўпни офсайд сабабли ҳисобга олмади.
Эслатиб ўтамиз, Испания Кубоги 1/16 финалида «Барселона» «Гвадалахара» клубини 2:0 ҳисобига мағлуб этганди. «Расинг» эса мазкур босқичда «Вильярреал» устидан 2:1 ҳисобига ғалаба қозонган эди.
Таъкидлаш жоиз, Испания Кубогининг амалдаги соҳиби ҳам «Барселона» ҳисобланади. 2024/2025 йилги мавсум финалида «кўк-анорранглилар» қўшимча бўлимларда «Реал»ни 3:2 ҳисобига таслим этганди.
Испания Кубоги. 1/8 финал
«Расинг» — «Барселона» 0:2
Голлар: Ферран (66), Ямал (90+5).
