Исмаэл Коне муваффақиятли операция қилинди
Канада терма жамоаси яримҳимоячиси Исмаэл Коне кичик ва катта болдир суякларининг синиши оқибатида муваффақиятли операция қилинди. Бу ҳақда Канада миллий жамоаси матбуот хизмати X ижтимоий тармоғида хабар тарқатди.
Шифокорларнинг прогнозларига кўра, футболчи жароҳатдан сўнг тўлиқ тикланишга эришади, бироқ у 2026-йилги Жаҳон чемпионатининг қолган ўйинларида жамоасига ёрдам бера олмайди.
Эслатиб ўтамиз, ЖЧ-2026 гуруҳ босқичининг 2-туридан ўрин олган Қатар терма жамоасига қарши учрашувда (6:0) Коне 55-дақиқада рақиб ҳимоячиси Ассим Мадибонинг қўпол подкатидан сўнг чап оёғидан оғир жароҳат олган ва майдонни замбилда тарк этган эди.
Маълумот учун, футбол бўйича Жаҳон чемпионати 11-июндан 19-июлга қадар АҚШ, Канада ва Мексика майдонларида бўлиб ўтмоқда. Амалдаги унвон соҳиби Аргентина терма жамоаси ҳисобланади.
