Ислом Маматказин: «Навбахор» билан мақсадим — чемпионлик ва Кубокни ютуш»
Наманганнинг «Навбахор» клуби айни пайтда ёзги йиғинни Туркияда давом эттирмоқда. Жамоа 11 турдан сўнг чемпионатда 4-ўринда.
Таркибида маҳорати баланд ва шу билан бирга келажаги порлоқ футболчилар йиғилган. Улардан бири истеъдодли ҳимоячи Ислом Маматказин ва у ҳозирги пайтга келиб, наманганликларнинг ҳимоя қўрғонида мустаҳкам ўйинчилардан бирига айланган.
Маматказин «Навбахор»га чемпионат бошида қўшилди. Суперлигада 8 та ўйинда майдонга тушди ва 1 та гол урди. Кубок баҳсида эса 2 та учрашувда қатнашди.
Ислом наманганликлар таркибида Туркия йиғинда иштирок этиш билан бирга Tribuna.uz учун интервью беришга ҳам вақт топди.
- «Навбахор» билан Туркия йиғинда қатнашяпсиз. Айтинг-чи, у ердаги ёзги йиғин қандай ўтяпти?
- Туркияда йиғин бошлаганимизга ҳам бир ҳафтадан ошди. Биринчи ўртоқлик учрашувини ўтказдик. Ҳаммаси яхши кечяпти, қизиқарли. 2 июль куни Туркиянинг «Истанбул Башакшехир» жамоаси билан ўйнаймиз. Бу баҳс ҳам қизиқарли бўлади.
- У ердаги тайёргарлик жараёнида энг асосий нарса нима?
- Туркияда аввало, жисмоний ҳолатга эътибор қаратилган. Қолаверса, яхши спарринг-рақиблар билан ўйинларимиз бор.
- Маълумки, мавсум аввалида клубга қўшилдингиз. Бошида захирадан тушиб ўйнадингиз, кейин асосий таркибдан жой олдингиз. Мураббийнинг ишончини қозониш учун нима қилдингиз?
- Ҳа, клубга йил бошида қўшилганман. Захирада? Барибир ҳаммада мослашиш жараёни бўлади. Мен билан боғлиқ асосий сабаби шундаки, ўтган йили охирги 4 ойни жароҳат туфайли ўтказиб юборгандим. Жароҳатим яхши тузалмаганлиги боис бу ерга келиб, бошида спорт формамни тиклаш учун бираз қийинчиликлар бўлди. Худога шукр, кейин барчаси яхши бўлиб кетди.
- Темур Кападзе билан илк бор ишлаяпсиз. Олдин у сизни олимпия миллий жамоасини бошқарган пайтда ҳам йиғинга чақирганини биламан. Кападзега қандай таъриф берасиз? У билан ишлаш қандай кечяпти?
- Тўғри айтасиз, Кападзе билан кўп ишламаган бўлсам ҳам авваллари бир-икки бор миллий жамоа йиғиларига чақирган. Темур Кападзе билан ишлаш яхши. Тактик ва яна бошқа жиҳатлар бўйича кўп нарса ўрганса бўлади.
- Клубнинг ҳозирги эгаллаб турган ўрни ўйинига мос дея оласизми?
- Жамоамизни турнир жадвалида эгаллаб турган ўрнига келсак, биз бундан ҳам юқорида бўлишга лойиқмиз. Жамоа 90 фоизга янгиланган. Шу сабабдан бошидан футболчиларни бир-бирини тўлиқ тушуниб олиши учун вақт кетди.
- Илгари «Андижон»да ҳимоячи сифатида голлар уриб турардингиз. «Навбахор»да ҳам бу ишни бажаришни қанчалик хоҳлайсиз ёки мураббийлар ҳимоядан чиқмаслигингизни айтишадими?
- «Андижон»даги фаолиятимга келсак, кўпроқ стандартларга урғу қаратиларди ва биз ҳам ҳужумга ёрдамга ўтардик. Вазиятларимиз кўп бўларди. Бу ерда асосан ўйинни назорат қилиш тактикаси асосида ҳаракат қиляпмиз.
- Маълумки, 2024 йилги Ўзбекистон Кубоги финалида «Навбахор»га гол ургансиз. Бу жамоага келганингизда ўша финал ва голингизни эслашдими?
- Ҳа, бу жамоага Кубок финалида гол урганман. Лекин Кубокдан ташқари бошқа ўйинларда ҳам бир неча бор «Навбахор» дарвозасини ишғол қилганман. Бошида мени ҳазил-ҳузул қилиб яхши кутиб олишди. Гоҳида эслаб турамиз, яхши хотира бўлиб қолган.
- Жамоада энг яқин дўстингиз ким? Кўпроқ ким билан мулоқот қиласиз?
- Жамоада ички муҳит зўр, ҳамма бир-бири билан дўстона. Маҳаллий ўйинчилардан Диёр Холматов, Муҳаммадали Усмонов, Шуҳрон Йўлдошев, легионерлардан Георги Жгереная билан кўп мулоқотдамиз. Лекин умумий олганда, барча йигитлар билан ажойиб муҳит шаклланган.
- «Навбахор» билан олдингизга қўйган асосий мақсадингиз нима?
- «Навбахор» билан мақсадлар юқори. Жамоа билан чемпионлик ва Кубокни ютуш. Худо хоҳласа, қўлдан келганича ҳаракат қиламиз.
