Ислом Ахмедов: «Ўйланган тактик режалардан кўнглимиз тўлди»
“Андижон” жамоасининг “Минск”га қарши охирги ўртоқлик учрашувидан кейин бош мураббий Ислом Ахмедов клуб матбуот хизматига интервью берди.
- “Андижон”нинг охирги назорат учрашуви ҳам якунланди. Қандай хулосаларга келдингиз?
- Умумий йиғинга тўхталадиган бўлсак, барчага тенг ўйин амалиётини бериш режамиз бор эди. Худди шундай режа асосида иш олиб борилди. Нечта ўйин ўтказган бўлсак, барчасига тенг ўйин амалиётини тақдим қилдик. Кечаги ўйинда таркибда майдонга тушганлар 90 дақиқа, бугунги таркибда ўйнаганлар ҳам 90 дақиқадан ҳаракат қилдилар. 70-80 фоизга жисмоний ҳолатимизни яхшилаб олдик. Қолганини Андижонда давом эттирамиз. Ўйланган тактик режалардан ҳам кўнглимиз тўлди. Барибир яна бир-иккита камчиликлар бор. Ўйинларни таҳлил қилган ҳолда уларни устида яна ишлаймиз.
- Йиғин мобайнида 2-3 нафар ўйинчилар кўрикдан ўтишди. Бугун ҳам бир футболчини синаб кўрдинглар ва гол ҳам урди. Улар ҳақида фикрингиз қандай?
- Ҳа, ўйинчиларни кўриб бордик. Мақсадимиз юқори ўринлардан бирини эгаллаш. Биз кўрган футболчилар эса ҳозирги ўйинчиларимизга рақобат қила олмайдилар. Майдонга тушганда ўрнини тўлдириб, кучайтириб бера оладиган даражадаги футболчилар эмас. Шу боис ўйинчи олишга шошилмаяпмиз.
- Энди бундан кейинги режалар қандай олиб борилади?
- Ўзбекистонга қайтгач, футболчиларимизга икки кунга дам берамиз. 9 июлда ўз қароргоҳимизда йиғиламиз. 12 июл кунига иккита учрашув режалаштирганмиз. Шунингдaн кейин яна бир кунга дам бергач, 14-санадан “Сурхон”га қарши учрашув учун расмий ўйинга тайёргарлик кўриб борамиз.
