Йохан Кройфнинг ўғли «Аякс»да иш бошлади
Амстердамнинг «Аякс» клуби Йохан Кройфнинг ўғли Йорди Кройфни клубнинг техник директори лавозимига тайинлади. Мутахассис ўз вазифаларини 2026 йил 1 февралдан бошлаб бажаради, шартнома эса 2028 йил июнигача амал қилади. Бу ҳақда клубнинг расмий сайти хабар берди.
«Бу мен учун жуда алоҳида лаҳза — шу ерда бўлиш ва шартнома имзолаш. Отам номи билан аталган стадионда, ҳаётимда ёшлигимдан муҳим ўрин тутган клубда ишлаш мен ва оилам учун нақадар катта аҳамиятга эга эканини ўзиёқ англатади. Феврал ойидан бошлаб бутун эътиборимни «Аякс»га қаратаман. Бу катта масъулият ва фахр. Клуб раҳбариятига билдирилган ишонч учун миннатдорчилик билдираман. «Аякс» бой тарихга эга ноёб клуб, у билан биргаликда янги ва муваффақиятли саҳифа очиш учун бор кучимни ишга соламан», — деди Кройф тайинлов муносабати билан.
Йорди Кройф фаолиятини «Аякс» ёшлар академиясида бошлаган, кейинчалик Испанияга кўчиб, «Барселона» билан шартнома имзолаган. Профессионал футболчи сифатида у «Барселона» ва «Манчестер Юнайтед» шарафини ҳимоя қилган, шунингдек, Нидерландия терма жамоаси сафида тўққизта ўйинда майдонга тушган. Футболчилик фаолиятини якунлагач, Кройф халқаро футболда турли лавозимларда ишлади, жумладан, «Маккаби» ва «Барселона» клубларида спорт директори бўлиб фаолият юритган. Ҳозирда у Индонезия футбол ассоциацияси маслаҳатчиси ҳам ҳисобланади.
