Йоахим Лёвга маслаҳатчи лавозими таклиф қилинди – Ўзбекистон билан музокаралар давом этмоқда
Sport24’нинг маълумот беришича, Германия миллий термаси собиқ мураббийи Йоахим Лёв ҳақиқатан ҳам Ўзбекистон футбол ассоциацияси билан музокаралар олиб бормоқда. Томонлар ўртасида мулоқот йўлга қўйилган, аммо сўз бош мураббийлик ҳақида эмас — унга терма жамоанинг Жаҳон чемпионатига тайёргарлигини кузатиб борувчи маслаҳатчи сифатида иш таклиф қилинган.
Манбанинг таъкидлашича, Лёв ҳамкорликка қизиқиш билдирган. Аммо ҳозирча уни бош мураббий сифатида тайинлаш режалаштирилмаяпти.
ЎФА ичида турлича фикрлар мавжуд. Бир гуруҳ расмийлар жамоага тажрибали мутахассис зарур деб ҳисоблаб, айнан Лёвни бош мураббий этиб тайинлаш тарафдори. Шу билан бирга, федерациянинг бошқа қисми жамоани мундиалга олиб чиққан Тимур Кападзени лавозимида қолдиришни маъқул кўрмоқда. Маълум қилинишича, Кападзе ёрдамчи вазифасини қабул қилишга тайёр эмас ва агар Лев бош мураббий бўлиб тайинланса, термадан кетиши мумкин.
Айни пайтда музокаралар давом этмоқда — Лёвнинг штабдаги аниқ роли юзасидан келишув изланмоқда.
