«Интер» мухлиси фаер портлаши сабабли бармоқларидан айрилди
Италия чемпионатининг 23-тури доирасида бўлиб ўтган «Интер» ва «Кремонезе» (2:0) учрашуви майдондаги ўйиндан кўра, трибуналардаги мудҳиш воқеа билан ёдда қоладиган бўлди. Бу ҳақда La Gazzetta dello Sport нашри хабар бермоқда.
Ўйин давомида «Интер» мухлисларидан бири рақиб жамоа дарвозабони Эмил Аудеро томонга фаер (пиротехника воситаси) улоқтирди. Портлаш зарбасидан карахт бўлиб қолган дарвозабон майдонга йиқилди. Аудерога шошилинч тиббий ёрдам кўрсатилди ва у оғир вазиятга қарамай, учрашувни охиригача давом эттиришга куч топди.
Бироқ пиротехника улоқтирган мухлиснинг ўзи кутилмаган бахтсиз ҳодисага дуч келди. Унинг қўлидаги иккинчи фаер вақтинидан олдин портлаб кетиши натижасида, у бир нечта бармоқларидан айрилди. Айни дамда у шифохонада, полиция эса безори тузалиши билан уни дарҳол ҳибсга олишини маълум қилган.
«Интер» футболчилари ўз мухлисларининг бундай нотўғри ҳаракатига кескин муносабат билдиришди. Учрашув якунлангач, жамоа аъзолари зўравонликка норозилик рамзи сифатида ўз мухлислари ўтирган трибуна олдига боришдан ва уларни қутлашдан бош тортдилар.
Турнир жадвалида «Интер» 55 очко билан пешқадамликни давом эттирмоқда. «Кремонезе» эса 23 очко билан 14-ўринда қолган.
