“Интер Майами” Рикелме Филлипини трансфер қилди
“Интер Майами” “Палмейрас”нинг 19 ёшли футболчиси Рикелме Филлипини ўз сафига қўшиб олди. Клуб расмий маълумотига кўра, бразилиялик вингер билан 2029/30-йилги MLS мавсуми охиригача шартнома имзоланган. Келишувни яна бир мавсумга узайтириш имконияти ҳам мавжуд.
Трансфернинг молиявий тафсилотлари клуб томонидан ошкор қилинмаган. Euro-Football Transfermarkt маълумотига таянган ҳолда, “Интер Майами” футболчининг ҳуқуқларининг 60 фоизи учун 4,2 миллион евро тўлаганини ёзмоқда.
Филлипи “Палмейрас” академияси тарбияланувчиси ҳисобланади. У клубнинг U-20 жамоаси сафида 80 та ўйинда 30 та гол ва 4 та ассист қайд этган. Асосий жамоада эса 11 та учрашувда майдонга тушган. Шунингдек, у Бразилия U-17 терма жамоаси билан 2023-йилги Жанубий Америка чемпионатида ғолиб чиққан.
Маълумот учун, “Интер Майами” сафида Лионель Месси ҳам тўп суради. Аргентиналик футболчининг клуб билан амалдаги шартномаси 2028-йилги MLS мавсуми охиригача мўлжалланган.
