Инфантино лавозимини сақлаб қолиш учун Трампдан ёрдам сўрамоқчи
FIFA президенти Жанни Инфантино ўз лавозимини сақлаб қолиш мақсадида АҚШ Президенти Дональд Трамп маъмуриятидан ёрдам сўрамоқчи. Бу ҳақда The New York Post хабар тарқатмоқда.
Нашр маълумотига кўра, Инфантино бугун, 3 август куни АҚШ Давлат котиби Марко Рубио билан учрашиши режалаштирилган.
“У Давлат котиби билан боғланиб, футбол Америка юмшоқ кучининг бир қисми бўлиши мумкинлигини муҳокама қилмоқчи эди. Аммо барчамиз биламизки, гап аслида унинг ишдан четлатилишининг олдини олиш ҳақида кетмоқда. Ҳозир бошқа нарса ҳақида гапиришнинг иложи йўқ”, дейди манбалардан бири.
Можаро авж олган пайтда Инфантино Дональд Трамп билан ҳам бир неча бор телефон орқали боғланишга уринган.
Эслатиб ўтамиз, Инфантино FIFA’нинг тижорат ҳуқуқларининг бир қисмини хусусий инвесторларга сотиш ташаббуси билан чиққанидан сўнг кескин танқидларга учраган эди. Кейинчалик у мазкур режадан воз кечган.
