Infantino Trampdan yordam so‘ramoqchi bo‘lib, lavozimini saqlab qolmoqchi
FIFA prezidenti Janni Infantino o‘z lavozimini saqlab qolish maqsadida AQSH Prezidenti Donald Tramp ma’muriyatidan yordam so‘ramoqchi. Bu haqda The New York Post xabar tarqatmoqda.
Nashr ma’lumotiga ko‘ra, Infantino bugun, 3-avgust kuni AQSH Davlat kotibi Marko Rubio bilan uchrashishi rejalashtirilgan.
“U Davlat kotibi bilan bog‘lanib, futbol Amerika yumshoq kuchining bir qismi bo‘lishi mumkinligini muhokama qilmoqchi edi. Ammo barchamiz bilamizki, gap aslida uning ishdan chetlatilishini oldini olish haqida ketmoqda. Hozir boshqa narsa haqida gapirishning imkoni yo‘q”, deydi manbalardan biri.
Mojaro avj olgan paytda Infantino Donald Tramp bilan ham bir necha bor telefon orqali bog‘lanishga uringan.
Eslatib o‘tamiz, Infantino FIFA’ning tijorat huquqlarining bir qismini xususiy investorlarga sotish tashabbusi bilan chiqqanidan so‘ng keskin tanqidlarga uchragan edi. Keyinchalik u mazkur rejadan voz kechgan.
