Инфантино ФИФАдаги фаолиятидан кейин йиллик 30 миллион долларлик лавозимни эгалламоқчи бўлган
ФИФА президенти Жанни Инфантино президентлик ваколати якунланганидан сўнг FIFA Forward Enterprise (FFE) номли янги тузилмада комиссар лавозимини эгаллашни режалаштирган. Бу ҳақда The Times нашри маълум қилди.
Манбага кўра, мазкур лавозимда Инфантинонинг асосий йиллик маоши 30 миллион АҚШ долларини ташкил этиши керак эди. Бу суммага турли бонуслар киритилмаган.
Режага мувофиқ, FIFA Forward Enterprise ФИФАнинг тижорат фаолияти ҳамда қатор йирик мусобақалар, жумладан, жаҳон чемпионатини ташкил этиш ҳуқуқларини бошқарувчи алоҳида ташкилотга айланиши кўзланган. Шунингдек, ушбу компаниянинг маълум улушини ташқи инвесторларга сотиш ҳам режалаштирилган эди.
Бироқ бу ташаббус ФИФА раҳбарияти ичида кескин баҳсларга сабаб бўлди. Қатор футбол амалдорлари ва федерация вакиллари мазкур режага қарши чиққан, ҳатто айрим томонлар бойкот эълон қилиш эҳтимолини ҳам билдирган. Натижада FIFA Forward Enterprise лойиҳасини амалга ошириш бекор қилингани ҳақида маълумотлар тарқалди.
Аввалроқ ОАВда Инфантино тайёрлаган мазкур режа амалга ошган тақдирда, у шахсан ўнлаб миллион фунт стерлинг миқдорида даромад олиши мумкинлиги ҳақида ҳам хабарлар чиққан эди.
