Инфантино: «2026 йилги Жаҳон чемпионати рекорд даражадаги мухлисларни жалб этади»
FIFA президенти Жанни Инфантино Швейцариянинг Давос шаҳрида бўлиб ўтган Жаҳон иқтисодий форумида нутқ сўзлади. У 48 та жамоа иштирок этадиган 2026 йилги жаҳон чемпионати бўйича рекорд кўрсаткичларни тақдим этди.
«Бу 48 та жамоа қатнашаётган илк жаҳон чемпионати бўлади — бу дунёдаги барча терма жамоаларнинг деярли чорак қисми дегани. Турнир доирасида учта мамлакатдаги 16 та замонавий стадионда 104 та учрашув ўтказилади. Стадионларда қарийб 7 миллион мухлис бўлади, телевидение орқали эса бутун дунё бўйлаб тахминан 6 миллиард киши томоша қилади. АҚШдаги мухлислар учун бу бир ой ичида ўтказиладиган 104 та Суперкубокдек бўлади. Тўрт ҳафта олдин чипталар савдосининг биринчи босқичини очдик ва 500 миллиондан ортиқ буюртма олдик. FIFA жаҳон чемпионатларининг қарийб 100 йиллик тарихида жами 50 миллионга яқин чипта сотилган, бу сафар эса атиги тўрт ҳафта ичида минг йиллик тарихга тенг буюртмалар олдик. Бу одамлар у ерда бўлишни, саёҳат қилишни ва бирга бўлишни хоҳлашини кўрсатади», — деди Инфантино.
Футбол бўйича 2026 йилги жаҳон чемпионати 11 июндан 19 июлгача АҚШ, Канада ва Мексикада бўлиб ўтади.
