Ильдар Маматказин: «Қирғизистон чемпионати бу йил янги босқичга чиқди»
Тажрибали ўзбек ҳимоячиси Ильдар Маматказин бир неча йил «Андижон» сафида тўп сурганидан сўнг клубни тарк этди. Футболчи 2025-йилни Қирғизистоннинг «Алай» жамоасида бошлади. Sports24.uz сайти 36 ёшли ҳимоячи билан суҳбатлашди.
– Ильдар, Қирғизистондаги фаолиятингиз қандай кечмоқда? «Алай»да ҳаммаси жойидами?
– «Алай»даги фаолиятим яхши давом этмоқда. 8-турдан сўнг биз 21 очко билан 2-ўриндамиз. Пешқадамдан атиги 1 очкога ортдамиз. Жамоамизда яхши футболчилар ва мураббийлар бор. Энг муҳими, жамоада уйғунлик ва ижобий ички муҳит бўлиши керак.
– Яқинда клубга қўшилгансиз, аммо жамоа сардори бўлдингиз. Бу кимнинг қарори эди?
– Анталиядаги йиғин пайтида мени жамоа сардори қилишга қарор қилинди. Бу мен учун катта шараф. Менга ишонч билдирганларнинг умидини оқлашга ҳаракат қиляпман.
– Қирғизистон чемпионати даражаси ҳақида нима дейа оласиз?
– Бу йил чемпионат даражаси янги босқичга чиқди. Сабаби, барча клублар сифатли легионерлар билан кучайди ва деярли барча ўйинлар кечқурун, ёритгичлар остида ўтказилмоқда. Бу футболчиларга қулайлик яратади ҳамда майдон сифатини яхшилайди.
– Йил бошида Қирғизистонда янги клублар пайдо бўлди. Бу ривожланишга қанчалик таъсир кўрсатмоқда?
– Янги клублар сонининг кўпайиши фақат фойда келтирмоқда. Ривожланиш тезлашди. Сабаби, илгари майдонда 5 легионерга рухсат берилган бўлса, энди 8 легионер ўйнаши мумкин.
– «Алай» 2017-йилдан бери мамлакат чемпиони, бироқ 2020-йилдан буён миллий кубокни юта олмади. Бу йилги мақсадингиз қандай?
– «Алай»нинг бу йилги мақсади — чемпионат ва кубок мусобақаларида ғолиб чиқиш. Яъни, сиз айтган «қора серия»га нуқта қўймоқчимиз.
- Сиздан ташқари «Алай» таркибида яна ўзбек футболчилари бор: дарвозабон Мирзохид Мамаҷонов, ҳимоячилар Муҳаммадали Турсунов ва Жамшид Қобулов, ярим ҳимоячилар Исмоил Абдураҳмонов ва Сарвар Аблаев, ҳужумчи Нуриддин Нуриддинов. Бу сизга қанчалик ёрдам бермоқда?
– Ватандошларимиз «Алай» сафида ўйнаётгани фақат фойда келтирмоқда. Чунки бир-биримизни яхши тушунамиз ва қўллаб-қувватлаймиз.
– Жамоада украиналик ҳужумчи Алексей Зинкевич ҳам бор. Унинг ўйинига қандай бахо берасиз?
– Алексей Зинкевич ҳақида айтадиган бўлсам, у сифатли ҳужумчи. Ҳар бир ўйин рақиб жамоа учун бош оғриқ. Дастлабки 7 учрашувда 5 та гол урди, 2 та голли узатма берди. Ишонаманки, бу натижалар ўзбек клубларининг ҳам эътиборини тортди.
– Қирғизистондаги стадионлардаги майдонлар ҳолати қандай?
– Қирғизистондаги майдонлар ҳолати аъло даражада. Ростини айтсам, бундай бўлишини кутмагандим. Яқинда «Абдиш-Ата»га қарши ўйнадик – ишончим комил, Ўзбекистонда бундай майдонга эга жамоалар жуда кам.
– Қирғизистон чемпионатидаги мухлислар ҳақида нима дейа оласиз?
– Қирғизистон чемпионатидаги ҳар бир ўйинга 1000-2000 киши ташриф буюради, лекин «Алай» иштирокидаги ўйинларда ўртача 4000-5000 томошабин бўлади. Ўш шаҳрида футболни чин дилдан яхши кўришади.
