Ildar Mamatkazin: “Qirg‘iziston chempionati bu yil yangi bosqichga chiqdi”
Tajribali o‘zbek himoyachisi Ildar Mamatkazin bir necha yil “Andijon” safida to‘p surganidan so‘ng klubni tark etdi. Futbolchi 2025-yilni Qirg‘izistonning “Alay” jamoasida boshladi. Sports24.uz sayti 36 yoshli himoyachi bilan suhbatlashdi.
– Ildar, Qirg‘izistondagi faoliyatingiz qanday kechmoqda? “Alay”da hammasi joyidami?
– “Alay”dagi faoliyatim yaxshi davom etmoqda. 8-turdan so‘ng biz 21 ochko bilan 2-o‘rinda boryapmiz. Peshqadamdan atigi 1 ochkoga ortdamiz. Jamoamizda yaxshi futbolchilar va murabbiylar bor. Eng muhimi, jamoada uyg‘unlik va ijobiy ichki muhit bo‘lishi kerak.
– Yaqinda klubga qo‘shilgansiz, ammo jamoa sardori bo‘ldingiz. Bu kimning qarori edi?
– Antaliyadagi yig‘in paytida meni jamoa sardori qilishga qaror qilindi. Bu men uchun katta sharaf. Menga ishonch bildirganlarning umidini oqlashga harakat qilyapman.
– Qirg‘iziston chempionati darajasi haqida nima deya olasiz?
– Bu yil chempionat darajasi yangi bosqichga chiqdi. Sababi, barcha klublar sifatli legionerlar bilan kuchaydi va deyarli barcha o‘yinlar kechqurun, yoritgichlar ostida o‘tkazilmoqda. Bu futbolchilarga qulaylik yaratadi hamda maydon sifatini yaxshilaydi.
– Yil boshida Qirg‘izistonda yangi klublar paydo bo‘ldi. Bu rivojlanishga qanchalik ta’sir ko‘rsatmoqda?
– Yangi klublar sonining ko‘payishi faqat foyda keltirmoqda. Rivojlanish tezlashdi. Sababi, ilgari maydonda 5 legionerga ruxsat berilgan bo‘lsa, endi 8 legioner o‘ynashi mumkin.
– “Alay” 2017-yildan beri mamlakat chempioni, biroq 2020-yildan buyon milliy kubokni yuta olmadi. Bu yilgi maqsadingiz qanday?
– “Alay”ning bu yilgi maqsadi — chempionat va kubok musobaqalarida g‘olib chiqish. Ya’ni, siz aytgan “qora seriya”ga nuqta qo‘ymoqchimiz.
- Sizdan tashqari “Alay” tarkibida yana o‘zbek futbolchilari bor: darvozabon Mirzoxid Mamajonov, himoyachilar Muhammadali Tursunov va Jamshid Qobulov, yarim himoyachilar Ismoil Abdurahmonov va Sarvar Ablayev, hujumchi Nuriddin Nuriddinov. Bu sizga qanchalik yordam bermoqda?
– Vatandoshlarimiz “Alay” safida o‘ynayotgani faqat foyda keltirmoqda. Chunki bir-birimizni yaxshi tushunamiz va qo‘llab-quvvatlaymiz.
– Jamoada ukrainalik hujumchi Oleksiy Zinkevich ham bor. Uning o‘yiniga qanday baho berasiz?
– Oleksiy Zinkevich haqida aytadigan bo‘lsam, u sifatli hujumchi. Har bir o‘yin raqib jamoa uchun bosh og‘riq. Dastlabki 7 uchrashuvda 5 ta gol urdi, 2 ta golli uzatma berdi. Ishonamanki, bu natijalar o‘zbek klublarining ham e’tiborini tortadi.
– Qirg‘izistondagi stadionlardagi maydonlar holati qanday?
– Qirg‘izistondagi maydonlar holati a’lo darajada. Rostini aytsam, bunday bo‘lishini kutmagandim. Yaqinda “Abdish-Ata”ga qarshi o‘ynadik – ishonchim komil, O‘zbekistonda bunday maydonga ega jamoalar juda kam.
– Qirg‘iziston chempionatidagi muxlislar haqida nima deya olasiz?
– Qirg‘iziston chempionatidagi har bir o‘yinga 1000-2000 kishi tashrif buyuradi, lekin “Alay” ishtirokidagi o‘yinlarda o‘rtacha 4000-5000 tomoshabin bo‘ladi. O‘sh shahrida futbolni chin dildan yaxshi ko‘rishadi.
