Йилнинг энг яхши мураббийи совринига номзодлар эълон қилинди — Флик рўйхатда йўқ
France Football нашри 2025/26 йилги мавсум якунларига кўра йилнинг энг яхши мураббийи совринига даъвогарлар рўйхатини эълон қилди. Мукофот учун Микель Артета, Луис де ла Фуэнте, Унаи Эмери, Венсан Компани ва Луис Энрике кураш олиб боради.
Номзодлар орасида Чемпионлар Лигаси ғолиби Луис Энрике, Англия чемпиони Микель Артета, Европа Лигаси соҳиби Унаи Эмери, Германия чемпиони Венсан Компани ва Испания терма жамоаси билан 2026 йилги жаҳон чемпионатида ғолиб чиққан Луис де ла Фуэнте бор. “Барселона” бош мураббийи Ҳанс-Дитер Флик эса якуний бешликка киритилмади.
Мукофотни аниқлашда жамоанинг ўйин сифати, қўлга киритилган совринлар, мураббийнинг етакчилик ва тактик маҳорати, футболчилар имкониятидан фойдаланиши ҳамда ёш истеъдодларни кашф этиши каби мезонлар ҳисобга олинади. Ғолиб халқаро спорт журналистлари овоз бериши орқали аниқланади.
Маълумот учун, йилнинг энг яхши мураббийи соврини ғолиби 26 октябрь куни Лондонда бўлиб ўтадиган “Олтин тўп” маросимида эълон қилинади. 2025 йилда ушбу мукофотни “Пари Сен-Жермен” бош мураббийи Луис Энрике қўлга киритган эди.
