IFAB вақтни чўзишга қарши курашиш мақсадида қўшимча чоралар кўриб чиқади — The Athletic
Халқаро футбол ассотсиациялари кенгаши (IFAB) келаси ҳафта ўйинда вақтни атайлаб чўзишга қарши қўшимча чораларни муҳокама қилади. Бу ҳақда The Athletic нашри хабар бермоқда.
Манбага кўра, сунъий тарзда ўйинни секинлаштиришга қарши кураш доирасида бир қатор янги механизмлар кўриб чиқилади. Хусусан, тўп аутга чиққандан ёки дарвоза зарбасидан кейин уни ўйинга киритиш учун аниқ вақт чегараси белгиланиши ва бунинг учун тескари саноқ жорий этилиши муҳокама қилинмоқда.
Шунингдек, футбол қонунчилари ўйин давомида амалга ошириладиган алмаштиришлар учун ҳам вақт лимити ўрнатиш масаласини кўриб чиқиши мумкин.
Аввалроқ ўйин давомида йўқотиладиган вақтни камайтириш мақсадида дарвозабон тўпни қўлида саккиз сониядан ортиқ ушлаб турган тақдирда рақиб жамоа фойдасига бурчак зарбаси белгиланиши ҳақидаги қоида жорий этилган эди.
