Хусановнинг трансфери бўйича компенсация ҳануз тўлангани йўқ
Беларуснинг “Энергетик-БГУ” футбол клуби франциялик “Ланс” орқали англиялик “Манчестер Сити”га ўтган ўзбекистонлик ҳимоячи Абдуқодир Хусановнинг трансфери бўйича ҳанузгача компенсация олмаган. Бу ҳақда клуб директори Александр Захарченя журналистларга маълум қилди.
Унинг сўзларига кўра, тўлов жараёни халқаро амалиётда яқинда жорий этилган янги механизмлар туфайли мураккаб ва секин кечмоқда. Мазкур тизим ҳужжатларни расмийлаштириш ва томонлар ўртасидаги келишувларни узоқ вақт талаб қилади.
Захарченя таъкидлашича, бундай кечикишлар фақат уларга хос эмас. Минскнинг “Динамо”си ва БАТЭ клублари ҳам ўз тарбияланувчилари учун мўлжалланган тўловларни олишда қийинчиликларга дуч келган. “Масалани назоратда ушлаб турибмиз, миллий футбол федерацияси билан ҳамкорликда иш олиб боряпмиз”, — деди Захарченя.
Эслатиб ўтамиз, 21 ёшли ҳимоячи Абдуқодир Хусанов 2023 йили “Ланс” сафига ўтганидан сўнг халқаро майдонда танила бошлаган. Унинг кейинчалик “Манчестер Сити”га ўтиши ўзбекистон футболи учун муҳим воқелик сифатида баҳоланмоқда.
