Хусанов Гвардиола қурбонига айланди: Нега Абдуқадыр ўйнамаяпти?
Абдуқадыр Хусанов «Манчестер Сити» сафидаги илк ўйинларида жуда яхши таассурот қолдирди. У «Ливерпул», «Реал Мадрид» ва «Тоттенхэм»га қарши беллашувларда ишончли ҳаракат қилиб, фанатлар ва мутахассисларнинг эътиборини қозонди. Аммо кейинчалик ҳимоячи асосий таркибдан чиқиб кетди.
Англия Кубогида «Борнмут»га қарши учрашувда ҳам у ишончли ўйин намойиш этди. Шундан сўнг, марказий ҳимояга Йошко Гвардиол ўтказилди ва у Рубен Диашнинг доимий шеригига айланди. Шу билан бирга, Хусанов захирада қолиб кетди.
Британиялик журналист Жек Гоганнинг таъкидлашича, Хусанов «шароитлар қурбони» бўлган:
«У кутилганидан анча яхшироқ ўйнади. Бироқ мавсумнинг ҳал қилувчи палласида Пеп Гвардиола тажрибали футболчини танлади».
Яна бир муҳим омил — адаптация жараёни. Ҳар қанча яхши ўйинлар намойиш этганига қарамай, Хусанов Англиядаги ҳаётга мослашишни давом эттирмоқда. У клуб ўқитувчиси ва Ўзбекистондан жалб қилинган хусусий репетитор ёрдамида инглиз тилини фаол ўрганмоқда. Экспертларнинг фикрича, бу унинг жамоадаги позициясини мустаҳкамлаш учун муҳим қадам ҳисобланади.
