Хулиан Алварес Чемпионлар лигасида Лионель Мессининг рекордини янгилади
Мадриднинг «Атлетико» клуби ҳужумчиси Хулиан Алварес Чемпионлар лигаси тарихида рекорд ўрнатди. Турнирнинг расмий X (собиқ Twitter) саҳифасида маълум қилинишича, аргентиналик футболчи мусобақадаги илк 30 ўйинда 17 та гол уриб, янги натижага эришди.
Аввал бу кўрсаткич бўйича рекорд Лионель Мессига тегишли эди — у «Барселона» ва «ПСЖ» сафида 30 учрашувда 16 та гол киритган. Учинчи ўринда эса Серхио Агуэро жой олган — у «Атлетико» ва «Манчестер Сити» учун ўйнаган даврида 14 та гол урган.
Шунингдек, Эрнан Креспо («Лацио», «Интер», «Милан», «Челси») ва Лисандро Лопес («Порту», «Лион») ҳар бири 13 тадан гол билан рейтингда кейинги ўринларни эгаллаб турибди.
Transfermarkt портали маълумотларига кўра, 24 ёшли Алвареснинг бозор қиймати ҳозирда 100 миллион еврони ташкил этади.
