Хулен Лопетеги: \"Бор эътиборимиз эртанги ўйинга қаратилган\"
ЖЧ-2026 саралаш боcқичи доирасидаги Ўзбекистон – Қатар учрашуви олдидан матбуот анжуманининг биринчи қисмида Қатар бош мураббийи Хулен Лопетеги ва футболчи Абдулазиз Ҳатим иштирок этди.
Хулен Лопетеги:
«Аввало, Ўзбекистон терма жамоасини Жаҳон чемпионати йўлланмасини қўлга киритгани билан самимий табриклайман. Бу жуда катта ютуқ ва жамоа бунга тўлиқ муносиб эди. Биз гуруҳдаги энг кучли жамоалардан бирига қарши ўйнаймиз. Мундиалга йўл очилишига кичик имкониятимиз сақланиб қолган, шунинг учун эртанги ўйинда бошқа футболчиларимизни синаб кўриш имконияти ҳам бўлади.
Ўзбекистонлик футболчилар Европанинг етакчи лигаларида фаолият юритмоқда. Эртанги ўйинни жуда жиддий қабул қилишимиз керак, чунки бу баҳс октябр ойида бошланадиган плей-офф босқичига дастлабки тайёргарлик учун хизмат қилади. Имкониятимиздан максимал даражада фойдаланиб, ғалаба учун курашамиз. Ўтган учрашувлар ҳақида гапирмоқчи эмасман, бор эътиборимиз эртанги ўйинга қаратилган.
Абдулазиз Ҳатим:
«Осиёнинг энг кучли жамоаларидан бирига қарши баҳс олиб борамиз. Икки жамоа ўртасидаги учрашувлар доимо муросасиз кечган. Плей-офф босқичига йўл олдик, шунинг учун эртанги ўйинни келаси босқич учун дастлабки тайёргарлик ўйини бўлади. Бу биз учун жуда муҳим ўйин, чунки рақибимиз Жаҳон чемпионати йўлланмасини қўлга киритган. Уларнинг футболчилари жисмонан ҳам, руҳий жиҳатдан ҳам кучли, бироқ биз ғалаба қозониш учун бор имкониятимизни ишга соламиз».
