Хуан Круз Гилл — «Нефтчи» мураббийлар штабида
Аргентина футбол мактаби вакили, тажрибали мутахассис Хуан Круз Гилл эндиликда «Нефтчи» жамоаси мураббийлар штабига қўшилди ва жамоа бош мураббийи Исломбек Исмоиловга ёрдамчи сифатида фаолият олиб боради. У жамоанинг машғулот жараёнлари, тактик тайёргарлик, футболчиларнинг индивидуал ривожи ҳамда аналитик ишларида бош мураббийга яқиндан ёрдам беради.
42 ёшли аргентиналик мутахассис футболчилик фаолияти давомида Аргентина, Чили, Кипр, Венесуэла ва Мальта клубларида тўп сурган. Ҳимоячи сифатида майдонда катта тажриба орттирган Хуан Круз Гилл айниқса Мальтанинг машҳур клубларидан бири — Valletta сафида муваффақиятли фаолият юритиб, бир неча совринларни қўлга киритган. У футболчилик фаолиятини якунлагач, мураббийликка ўтиб, профессионал фаолиятини ёрдамчи мураббий сифатида давом эттирди.
Хуан Круз Гилл мураббийлик фаолиятида CONMEBOL PRO License ва UEFA A License даражасидаги лицензияларга эга бўлиб, замонавий футбол методикаси, тактик таҳлил ва машғулот жараёнларини ташкил этиш бўйича тажрибага эга мутахассис ҳисобланади. Сўнгги йилларда у Жанубий Америка футболида фаол ишлаб, профессионал жамоалар мураббийлар штабида фаолият олиб борди.
