Хосе Мария Мендес — «Пулпис»дан Ўзбекистон футзал федерацияси президенти Бекзод Маматқулов номига мактуб келди
Футзал бўйича Ўзбекистон миллий терма жамоаси бош мураббийи, испаниялик таниқли мутахассис Хосе Мария Мендес — «Пулпис»дан Ўзбекистон футзал федерацияси президенти Бекзод Маматқулов номига мактуб келди.
Унда жумладан шундай дейилади:
Ҳурматли жаноб Бекзод Маматқулов!
Сизга самимий ҳурматимни изҳор этган ҳолда, ушбу миннатдорчилик мактубимни йўллаяпман.
Ўзбекистон футзал федерациясининг ишончи ҳамда Сизнинг таклифингиз билан миллий терма жамоа бошқарувини катта умид ва эзгу ниятлар билан қабул қилган эдим.
Бироқ, мутлақо кутилмаганда соғлиғим билан боғлиқ жиддий муаммо туфайли шартномада белгиланган муддатдан анча олдин Ўзбекистондаги фаолиятимни якунлаётганимдан афсусдаман. Шифокорларнинг тавсияси ва талаби билан маълум муддат профессионал спортдан узоқлашишим ҳамда жиддий даволаниш курсини ўташім зарур.
Шу боис ушбу мактубни хайрлашув хати сифатида қабул қилишингизни сўрайман.
Гарчи қисқа фурсат давомида ҳамкорлик қилган бўлсак-да, Сиз билан бирга ишлаш имкониятини чин дилдан қадрладим. Мен масофадан туриб бўлса-да, миллий терма жамоанинг бундан кейинги фаолиятини кузатиб, унга мухлислик қилиб бораман.
Ишончим комилки, Сизлар албатта Жаҳон чемпионати йўлланмасини қўлга киритасизлар. Биз ишонч билдирган йигитлар ўзбек футзали мухлисларига ҳали кўплаб қувончли ва унутилмас лаҳзаларни тақдим этади.
Бўлажак мураббийлар штабига менинг ёрдамим ёки маслаҳатим керак бўлса, ҳамиша кўмак беришга тайёр эканлигимни маълум қилмоқчиман.
Мени тушунганингиз ва истеъфомни қабул қилганингиз учун Сизга яна бир бор миннатдорлик билдираман.
Сизга ҳамда ўзбек футзалига улкан зафар, муваффақият ва омад ёр бўлишини тилайман.
Ҳурмат билан,
Хосе Мария Пасос Мендес «Пулпис»
