Холанднинг «Реал»га ўтишига тўсқинлик қилиши мумкин бўлган учта омил маълум бўлди
«Манчестер Сити» ҳужумчиси Эрлинг Холанд «Реал» клубига ўтишни кўриб чиқмоқда. Ўз навбатида, «Қироллик клуби» президенти Флорентино Перес 25 ёшли норвегиялик футболчини келаси ёзда таркибга қўшишни орзу қилмоқда. Клуб раҳбари Холанднинг агенти билан алоқаларни давом эттирмоқда. Бу ҳақда Sky Sport Germany хабар бермоқда.
Манбага кўра, «Реал» Холанд трансферида бир қатор жиддий муаммоларга дуч келиши мумкин:
Футболчининг «Манчестер Сити» билан 2034 йилгача амал қиладиган узоқ муддатли шартномаси бор.
Трансфер амалга ошиши учун Винисиус Жуниор Мадрид клубини тарк этиши керак бўлади.
Холандни сотиб олиш «Реал»га 500 миллион евродан ортиқ маблағга тушиши мумкин.
Жорий мавсумда норвегиялик ҳужумчи барча мусобақаларда 29 та ўйинда майдонга тушиб, 26 та гол ва 4 та ассист қайд этган. Transfermarkt порталига кўра, Холанднинг бозор қиймати 200 миллион еврони ташкил қилади.
