Хименес жарроҳлик столига ётади
«Милан» ҳужумчиси Сантьяго Хименес ўнг тўпиғидан операция қилиниши аниқ бўлди. Бу ҳақда La Gazzetta dello Sport хабар бермоқда.
Ҳужумчи сўнгги бор 28 октябрь куни «Аталанта»га қарши ўйинда майдонга тушган ва 62-дақиқада алмаштирилган эди. Шу вақтдан бери футболчи даволаниш курсини ўтди, бироқ эндиликда жарроҳлик амалиёти ўтказиш бўйича қарор қабул қилинди. Операция шу ҳафта охирида ёки кейинги ҳафтанинг бошида амалга оширилади.
Маълум қилинишича, муаммо бевосита суяк билан боғлиқ бўлиб, пайлар ёки тоғайларга зарар етмаган. Шу сабабли Хименес тахминан олти ҳафтадан сўнг майдонга қайтиши мумкин. Тикланишнинг максимал муддати эса икки ой этиб баҳоланмоқда.
Жорий мавсумда Сантьяго Хименес «Милан» сафида 11 та ўйинда майдонга тушиб, битта гол ва битта голли узатмага муаллифлик қилган.
