Хави: «ЖЧ-2022дан сўнг Мессининг қайтиши ҳал қилинганди, бизда Ла Лиганинг рухсати ҳам бор эди»
«Барселона»нинг собиқ бош мураббийи Хави Эрнесто Эрнандес Лионел Месси каталонияликлар сафига қайтиши нега амалга ошмай қолганига ойдинлик киритди. Унинг сўзларига кўра, бунга клуб президенти Жоан Лапорта тўсқинлик қилган.
La Vanguardia нашрига берган интервьюсида Хави шундай деди:
«Қатардаги 2022 йилги жаҳон чемпионатидан сўнг Мессининг қайтиши ҳал қилинган масала эди. Лео қайтишни хоҳлаганди, бизда Ла Лиганинг рухсати ҳам бор эди. Бироқ Лапорта трансферни тўхтатиб қўйди. У менга, агар Месси қайтса, маошлар борасида муаммолар юзага келишини ва клуб буни кўтара олмаслигини айтди».
Хави, шунингдек, Месси қайтмаслигига Ла Лиганинг чекловлари ёки футболчининг отаси пул талаб қилгани ҳақидаги миш-мишларни рад этди. Унинг фикрича, бу фақат Лапортанинг шахсий қарори бўлган.
Эслатиб ўтамиз, айни дамда Лионел Месси фаолиятини АҚШнинг «Интер Майами» клубида давом эттирмоқда.
